تخيلوا لو البنات هيا اللى تخطب الولاد!!!!!

تخيلوا لو البنات هيا اللي تخطب الولاد ايه اللى هيحصل تعالو نشوف....

تخيل كده وانت قاعد في اوضتك وعمال تقرا في كتاب رومانسي وخيالك سرحان مع فارسة احلامك تيجي تاخدك وهيا راكبه على الحصان الابيض

وفجأة تلاقي مامتك دخلت عليك وكانت اصلا قاعده مع الجيران
وتلاقيها بتقولك انا عايزه اتكلم معاك في موضوع يا ابني .... طبعا هترد عليها وانت قلقان خير يا ماما؟؟؟
تقول ومامتك : والله يا ابني ام محمد جارتنا عاوزه تخطبك لبنتها . وانت ما شاء الله عليك كبرت واحلويت والكل عاوزك...... ايه رأيك يا ابني ؟
ساعتها تنزل راسك في الارض وتلعب في شعرك او في شنبك وترد وانت مكسوووووف وخدودك حمرا

الرأي رأيك والشوره شورتك يا ماما لأ لأ لأ يا( مامي احسن )
ومامتك تقولك بقى : والله انا مش شايفه في البنت حاجه
ماشاء الله عليها محترمه و وظيفتها محترمه ومرتبها محترم وعيلتها كمان كويسه وبعدين من الشغل للبيت ومن البيت للشغل ولا بتدخن ولا بتخرج مع البنات صاحباتها يعني من الاخر بنت كويسه اوي

انت بقى تقول لمامتك: بس يا مامي هيا عمرها ما شافتني خالص
مامتك تقول : هيا شافتك وانت نازل من اتوبيس المدرسه بتاعك
بس يا سيدي وسألت عليك وقالولها انك ولد كويس وابن ناس
ولا بتروح تسهر بره ولا بتروح مع اصحابك تسهر معاهم في الكوفي شوبات
وقالولها كمان انك مبتخرجش الا مع ابوك
المهم يا ابني هيا وامها جايين يوم الخميس علشان يشوفوك
انت تسأل وتقول : طيب يا مامي بابي رأيه ايه ؟؟
ترد والدتك وتقول : والدك ما يعرفش حاجه هو مشغول في المطبخ وتنضيف البيت.
انت تقول : خلاص يا مامي اللي انتي شايفاه
وتخرج والدتك من الاوضة

وانت تقوم جري تقف قدام المرايا وتلف نص لفه يمين ونص لفه شمال وتشوف نفسك وتسرح شعرك وشنبك بمنتهى الدلع

وتقول : اخيرا حست بيا وخطبتني -

وقبل يوم الخميس تروح للكوافير الرجالي وتكون حاجز قبلها وتصبغ شعرك هاي لايت وتطلع زي القمر في الاخر

وتيجي للبيت وتلبس البنطلون والقميص اللي كلة كرانيش وتحط البرفان الرقيق الناعم) كل ده وخطيبتك و امها قاعدين بره

وفي اللحظه دي باباك يقولك : يالله يا ابني دخل العصير لعروستك امك عماله تسأل عنك لحد ما خنقتني
وانت تقول لباباك : يا بابي انا بتكسف مش هاقدر ادخل العصير
وابوك يقول وهو حاطط ايده على كتفك يالله يا ابني روح لعروستك هىءهىء
وانت تقول : يا بابي انت دايما تحرجني كده ...
وساعتها تدخل صينيه العصير وانت على الباب تقول احم احم وبكل ادب ورقه ودلع تقول سسسسسسلامو عليكم
وترد هيا عليك بعد ما تقف وتقولك وعليكم السلام وهيا عينها هتطلع عليك
وتقولها اتفضلي العصير وانت طبعا بتقدم نوعين عصير برتقال وفراوله
وهيا تسألك ايه احلى العصير الاصفر ولا الاحمر ؟
انت ترد تقولها الاتنين حلوين
وهيا ترد طبعا عشان انت اللي عملته بأيدك
وتحط الصينيه بسرعه وتحط ايدك على بوئك وتكتم الضحكه وتطلع بسرعه من الاوضة دي
وتلاقي اخوانك الولاد يسألوك شكلها ايه ؟
وانت تقوللهم : تهبل يا اخواني والله حلوه اوي ودمها خفيف

وفجأه تسمع باباك بيزغرط وبيقولك مبروك يا ابني

هههههههههههههههههههههههههههههه